Сұрақ: Дінде надандықтың кесірі қандай?
Жауап: «Надандық» сөзінің білімсіздік, қараңғылық, мәңгүрттік, мәдениетсіздік деген кең мағыналары бар. Надандық – қазіргі заманның аса қауіпті дерті. Надандық жайлаған жерде, қоғам күйрейді. Дінді надандықпен қабылдаса асыра, діншілдікке бой алдырады. Ондай адам елдің діни тұрақтылығына қаупін төндіреді.
Оның салдары діннен, ғылымнан, мәдениеттен, адамгершіліктен алыстатуға дейін апарады. Надандықтың мынадай кесірлерінен сақ болғанымыз дұрыс: Дұрыс ой түйе алмай ақиқат пен жалғанды ажыратуы қиындайды, өз әрекетінің салдарын түсінбегендіктен қоғамға және басқаларға зиян келтіреді, дін негіздерін түсінбей, үстірт сенімге сүйенсе шектен шығып фанатизмге ұрынады, түрлі жағдайларды дұрыс таразылай алмай, іріткі мен алауыздыққа бейім болады.
Абай атамыз: «Күллі адам баласын қор қылатын үш нәрсе бар, сонан қашпақ керек. Әуелі – надандық, екінші – еріншектік, үшіншісі – зұлымдық» десе, сахаба Әли (р.а.): «Адамның ең үлкен жауы – оның надандығы» деген. Демек, надандықтың емі білім мен дұрыс тәрбиеде екен.
Икрам АЙТАЕВ
