Сұрақ: Пайғамбарлар деген кімдер?
Жауап: Пайғамбарлар да біз секілді Алла Тағаланың пенделері. Олар да Адам (ғ.с) перзенттері. Бірақ олар Алла Тағаланың лайықты пенделері, жас кезінен зерек әрі ерекше ақылды және туралыққа, тазалыққа табиғатынан бейім болғандар. Оларда еш уақытта нұқсан және кемшілік болмайды. Алла Тағала оларды пайғамбарлыққа лайық деп тапқандықтан, пайғамбар етіп тағайындаған.
Сұрақ: Оларды Алла Тағала қалай пайғамбар етеді?
Жауап: Жәбірейіл (ғ.с) арқылы оларға уахи (сөзін және үкімдерін) жіберу арқылы әрбірін хақ дінге жетелеген.
Сұрақ: Сосын пайғамбарлар не істеген?
Жауап: Алла Тағаланың әмірі бойынша пенделерді хақ дінге және әрбір жақсылыққа шақырған.
Сұрақ: Пенделер пайғамбарлардың сөздерін қабылдады ма?
Жауап: Бірден қабылдамады. Олардың шын пайғамбар екендіктеріне (Алла Тағаладан келген пайғамбар екендігіне) қандай да бір дәлел талап етеді. Сосын пайғамбарлар Алла Тағаладан «мұғжизалар» сұрайды. Мұғжиза – пенделердің қолынан келмейтін істер. Адамдар сол мұғжизаны көрген кезде дұрыс түсінген көкірек көзі ашықтары пайғамбарға сенеді, ал надандары сенбейді. Пайғамбарларды сиқыршы деп, кейбіреулері тәкаппарлықпен ескі діндерін тастағысы келмей намыстанса, кейбіреулері ескі әдет-ғұрыптарына үйреніп қалғандықтан, пайғамбарларға сенбеген.
“Ислам ғибадаты” кітабынан
