Сұрақ: Хараммен тапқан табыстың қандай зияны болады?
Жауап: Ислам діні арам мен адалдың ара жігін айқындап берген. Адам харамның парқына бармай нәпсіге еріп, құмар ойнап, ұрлық істеп, алдап-арбап жұрттың дүниесін тартып алып, пара беріп, пара алып, т.б. іс-әрекеттерге баруы мүмкін. Кейбір адамдар не болыпты деп салдарын білмей, харам табыспен бала-шағасын бағып жүр. Мұндай харамның саны арта берсе түбінде рухани азғындап, әсерін көреді. Харам дүние табуды тоқтатпаса, ол рухани зиян келтіреді, отбасында ұрыс-керіс, мазасыздық тудырады, тапқан ақшасы қайда кеткені белгісіз болып, берекесі сезілмейді. Сондай-ақ, жүректі қарайтады, ниет пен нығметті былғайды. Хараммен мал табуды тоқтатпаса, оның ақыретте де сұрауы бар.
Ал адал еңбекпен тапқан дүниеде береке болып, көңілі тынышталып, өмірде тыныштық пен рахат сезімге жетеді.
«Бақара» сүресінің 172-аятында: «Уа, иман келтіргендер! Өздеріңе ризық етіп бергендеріміздің адал, таза һәм денсаулыққа пайдалы болғанынан жеңдер» деген.
Алла Тағала халал жолмен тапқан дүниенің берекесін берері хақ. Нәпсіге ие болып, адал жолмен табыс табу қайырлы іс екен.
Икрам АЙТАЕВ
