Йемендік хуситтердің хабарлауынша, өткен аптаның сәрсенбі күні ел астанасы Санаға жасалған Израильдің әуе шабуылдарының салдарынан қаза тапқан 46 адамның ішінде жергілікті БАҚ-тың 26 қызметкері бар. Бұл туралы Синьхуа агенттігі мәлімет таратты.
Хабарда айтылғандай, шабуыл нәтижесінде Сана орталығындағы Тахрир алаңында орналасқан «26 қыркүйек» және «Әл-Йемен» газеттерінің кеңселері қираған. Сондай-ақ мәлімдемеде бұл шабуыл «БАҚ қызметін әлсірете алмайды» деп көрсетілген.
Хуситтердің бақылауындағы денсаулық сақтау органдарының хабарлауынша, әйелдер мен балаларды қоса алғанда 165 адам жарақат алған. Хуситтер басқаратын «Әл-Масира» телеарнасы қираған тұрғын үйлер мен үйінділерді аршып жатқан құтқарушылардың кадрларын көрсетті.
Израиль әскері өз кезегінде соққылардың әскери лагерьлерге, хуситтердің қоғаммен байланыс жөніндегі штаб-пәтеріне және жанармай қоймасына жасалғанын мәлімдеп, бұл әрекеттерді дрондар мен зымырандар арқылы жасалған шабуылдарға «жауап» деп атады.
Өткен аптадағы әуе шабуылдары кезінде кеңсесі де зардап шеккен көтерілісшілер қарулы күштерінің ресми өкілі Яхья Сария кек қайтаратынын айтып, Израильдің соққылары жауапсыз қалмайтынын мәлімдеді.
Йеменнің солтүстігінің басым бөлігін бақылауында ұстап отырған хуситтер Израильге қарсы шабуылдарын жалғастырып, Газаға қатысты соғысты және блокаданы тоқтатуға ұмтылатынын айтты.
