Елімізде Ішкі істер министрлігінің ұйымдастыруымен «Қару» республикалық жедел-алдын алу іс-шарасы өтіп, нәтижесінде қаңтар оқиғасы кезінде ұрланған қару-жарақ табылды, деп хабарлайды Egemen.kz.
Ішкі істер министрлігінің мәліметінше, елімізде қару-жарақ пен оқ-дәрілердің заңсыз айналымына қарсы ауқымды рейд жүргізілді. Шара барысында 400 заңсыз қару, 2 500-ден астам оқ-дәрі мен 6 жарылғыш зат тәркіленді. Сондай-ақ, 40 жасырын қару қоймасы анықталды.
Аталған іс-шара Қаңтар оқиғасы кезінде ұрланған полиция қарулары мен арнайы құралдарын да қайтаруға мүмкіндік берді. Тәркіленген заттар қатарында 2 Калашников автоматы, 4 тапанша, 4 аңшы мылтығы, қызметтік бронежилеттер, каскалар мен қалқандар бар.
Азаматтардың да белсенділігі байқалды – олар 87 қаруды өз еркімен тапсырған. Бұл жағдай халықтың заңсыз қару айналымына бей-жай қарамайтынын дәлелдейді.
Рейд шеңберінде 29 000-нан астам азаматтық қару тексеріліп, 845 адам әкімшілік жауапкершілікке тартылды. Сонымен қатар полиция қызметкерлері 10 000-нан астам шаруа қожалығын аралап, 65 заңсыз қаруды тәркіледі.
ҚР ІІМ Криминалдық полиция департаментінің бастығы Қанат Нұрмағамбетовтың айтуынша, қару-жарақ пен оқ-дәрілердің заңсыз айналымына қарсы жүйелі жұмыстар алдағы уақытта да жалғасады.
