Елімізде заңсыз айналымдағы қару-жарақты, сондай-ақ оның жасырылған орындарын анықтау және тәркілеу жұмыстары жалғасып жатыр, деп хабарлайды Egemen.kz.
Бұл бағытта ішкі істер және ұлттық қауіпсіздік органдары бірлесіп іске кіріскен. Мәселен, Шымкенттің Тұран ауданында автожол маңындағы арықтан қару-жарақ жасырылған орын анықталды. Онда үш аңшылық мылтық, бір аңшылық мылтықтың кесіндісі және тапанша табылған. Мылтықтардың бірінің 2022 жылғы қаңтар оқиғасы кезінде Алматыдағы қару-жарақ дүкенінен ұрланғаны анықталды.
Осыған ұқсас жағдай Петропавлда да тіркелді. Қала аумағындағы ашық жерден аңшылық мылтық, нөмірлері өшірілген екі аңшылық мылтықтың кесіндісі, бронежилет және 27 дана оқ-дәрі табылған.
Ішкі істер министрлігі заңсыз сақталған қаруды өз еркімен тапсырған азамат қылмыстық және әкімшілік жауапкершіліктен босатылатынын еске салды. Сондай-ақ ведомство 20 сәуірден бастап жыл соңына дейін халықтан заңсыз сақталған атыс қаруын, оқ-дәрілер мен жарылғыш заттарды сатып алу бойынша акция өткізіп жатыр. Бүгінде азаматтар акция аясында шамамен 900 дана түрлі қару және 6 мыңға жуық оқ-дәрі тапсырған.
Заңсыз айналымдағы қару-жарақ пен оқ-дәрілерді анықтау және тәркілеу бойынша жұмыстар жалғасып жатыр.
