Сұрақ: Намаз қандай ғибадат?
Жауап: Намаз – бес парыздың бірі. Оның парыздығы Құран және хадистермен нақтыланған.
Діни танымда намаз тәкбірмен басталып, сәлеммен аяқталатын, ерекше қимыл-қозғалыстар мен сөздерден тұратын ғибадат түрі.
Намаздың хикметтері өте көп. Ол адамның жүрегіне нұр сыйлайды. Оның хикметтері жайлы Құран аяттары мен хадистерде көптеп баяндалған.
Пайғамбарымыздың (с.а.у.) хадисінде: «Бес уақыт намаз пенделерге парыз қылынған. Мән беріп, ешбір нәрсесіне немқұрайды қарамай сол бес уақыт намаздың парызын орындаған кісіні пейішке кіргізуге Алла уәде қылған. Бес уақыт намаздың парыздарын орындамағандармен Алланың ешқандай келісімі жоқ. Қаласа, оны азапқа салады, қаласа, кешіреді», десе, тағы бір хадисінде: «Пенде үлкен күнә жасамаса, оқыған намазы өткен-кеткен барлық күнәларын жуады» деген.
Намазға немқұрайлы қарамай, толық орындауымызға Алла күш-қуат берсін!
Икрам АЙТАЕВ
