Сұрақ: Парыз амалдардың қандай түрлері бар?
Жауап: Парыз – балағат жасына жеткен әр мұсылман орындауға тиіс, нақты дәлелдермен бұйырылған амалдар. Олар Құран аяттарымен бекітілген иман келтіру, намаз оқу, ораза ұстау, зекет беру, шамасы келсе қажылыққа бару, т.б. амалдар.
Олар «парыз айн» және «парыз кифая» деп екіге бөлінеді.
«Парыз айн» – балағат жасына жеткен әр мұсылман жеке орындалуға тиіс амалдар, мысалы, намаз, ораза, дүниесі мөлшеріне жетсе зекет беру, шамасы келсе қажылыққа бару, т.б. Парыз амалдарын орындауда мол сауап бар. Оны орындамағандар ауыр күнәға батады.
«Парыз кифая» бір топ мұсылмандар іске асыруы арқылы барша мұсылмандар мойнынан түсетін жаназа намазы сынды міндеттер.
«Бақара» сүресінің 43-аятында: «Намазды кемеліне жеткізіп, үзбей әрі уақытылы оқыңдар, зекет толық беріңдер және иіліп рукуғ жасаушылармен бірге рукуғ жасаңдар» деген.
Исламның бес парызын Құран аяттары арқылы, нақты бұйрықтармен бекіткен. Парыз амалдарын орындап, Алланың ризашылығына бөлене берейік.
Икрам АЙТАЕВ
