Сұрақ: Сауап пен күнәнің айырмасы қандай?
Жауап: Исламда адамның істеген амалдарын бағалайтын сауап және күнә деген екі ұғым бар. Сауап – Алланың разылығы үшін жасалған қайырлы амалдар үшін берілетін рухани сый. Сауапты амалдардың санатына намаз оқу, ораза ұстау, ата-анаға құрмет көрсету, мұқтаждарға көмек қолын созу, иманды бала тәрбиелеу, білім алу6 т.б. сынды жақсы амалдар кіреді.
Күнә – Алланың бұйрығына қарсы келетін және харам еткен амалдар. Ал, күнә істер – өтірік айту, ғайбаттау, зұлымдық ету, ұрлық жасау, әділетсіздік көрсету, біреуге қиянат жасау т.б. амалдар.
Адам харам істен аулақ болып, нәпсіuе ерік бермей, сауапты амалдарымен Алланың ризашылығына бөлене алады. Ал, Алланың харам еткен істерімен күнәға батады. Күнә амалдарда Алланың ризашылығы болмайды.
Пайғамбарымыздың (с.а.у.) хадисінде: «Кім жақсы іске жол салса және оны іске асырса, оған сауап жазылады. Сондай–ақ, сонымен амал етушілердің де сауабы жазылады. Ал кім бір жаман іске жол ашса, ол адамға оның күнәсы және қияметке дейін оны істеушілердің күнәсы шамасында күнә жазылады», деген.
Демек, күнәдан сақтанып, жақсылық жасауап, сауапқа бөлену саналы адамның ісі екен.
Икрам АЙТАЕВ
