Сыр өңіріне жұмыс сапарымен келген ҚМДБ Төрағасының орынбасары, наиб мүфти Сансызбай Құрбанұлы Қызылорда қалалық тарихи «Айтбай» мешіті жанындағы кітапхананың ашылу рәсіміне қатысты.
Наиб мүфти кітапхана жұмысымен танысып, оң бағасын берді. Айта кетейік, бір жарым ғасырға жуық тарихы бар аталмыш мешіт жанынан ашылған кітапханадағы кітап қоры 400-ден асады. Сөрелеріне діни және әдеби жанрдағы тәлімдік туындылар қойылған. Басым көпшілігі Қазақстан мұсылмандары діни басқармасына қарасты «Muftiyat» баспасының өнімдері.
Сондай-ақ сапар аясында ҚМДБ Төрағасының орынбасары Сансызбай Құрбанұлы Қызылорда облыстық «Ақмешіт-Сырдария» орталық мешітіне жұма намазын оқуға жиылған жұртшылықты «Амал» мерекесімен құттықтап, «Зекеттің қоғамдағы пайдасы» тақырыбында уағыз айтты. Ата-баба рухына Құран бағыштап, жамағатпен бірге ел тыныштығы үшін дұға тіледі.
Бұдан кейін Сансызбай Құрбанұлы ҚМДБ «Зекет және қайырымдылық» қорының ұйымдастыруымен өткен «Рамазан сыйы» қайырымдылық марафонына арнайы қатысты. Айта кетейік, Діни басқарманың 35 жылдығына және Рамазан айының құрметіне орай Бас мүфти Наурызбай қажы Тағанұлының тапсырмасымен 35 000 отбасына азық-түлік тарату марафоны бастау алған болатын. Берекелі айдың алғашқы он күндігінде басталған жоба жыл бойы жалғасын табады.
