Сұрақ: Үш талақ беріп ажырасқаннан кейін қайта қосылу үшін әйел алдымен басқа еркекке тұрмысқа шығуы керек пе?
Жауап: Исламда ажырасу – құптарлық іс емес. Отбасын сақтап қалу – үлкен сауапты амал. Қазіргі таңда дін негіздерін біліп, білмей, талақ етіп ажырасып жатқандар баршылық. Үш талағын беріп белгілі (идда) мерзімін күтіп ажырасып жатады. Кейіннен істеген әрекеттеріне өкініп, қайта қосылайын десе, әйел басқа бір еркекпен тұрмыс құрып, онымен қосылып, ол адам оны талақ етіп, әйелдің күтетін етеккір мерзімі (иддә) бітуі тиіс деген шариғаттың шарты бар. Осындай амалдан кейін күйеуі әйелді жаңа мәһрмен жаңа неке арқылы өзіне ала алады.
Ажырасып, қайта қосылудың осындай ауыр шарты бар екенін білген жөн. Талақ бермей жатып жүз рет ойланғанымыз абзал. Ислам тарихында әйелін бірден үш талақпен талақ еткен кісінің әрекетін естіген Пайғамбарымыз (с.а.у.) ашуланып: «Алланың аяттарын мазақ еткісі келе ме?!» деп реніш білдірген.
«Бақара» сүресінің 230-аятында «Егер ер адам әйелін талақ етсе, ол әйел өзге еркекпен тұрмыс құрмайынша оған адал болмайды…» деген. Нәпсіге ерік беріп, шайтанды қуантатын амалдан сақ болғанымыз абзал. Бұл мәселе күрделі болғандықтан, нақты шешім қабылдамай ҚМДБ-ның жергілікті пәтуаға жауапты имамдарымен ақылдасып шешкен қайырлы болмақ. Себебі мәзһаб ғалымдарының жоғарыдағы мәселеге жеңілдетілген түрлі пікірі ескеріледі.
Икрам АЙТАЕВ
