Сұрақ: Рамазан айында үйленіп, той жасауға бола ма?
Жауап: Шариғатта «Рамазан айында неке қиюға немесе той жасауға болмайды» деген тыйым жоқ. Рамазанды Алла Тағала айлардың сұлтаны еткен. Бұл айда ораза ұстап, құлшылық амалдарын арттырып, рухани тазалыққа бет бұрып Алладан сауап үміт ету қажет. Азаннан кешке дейін ораза ұстап, ауыз ашар беріп, кешке тарауық намазы оқылады. Мұндай айда жақсы амалдарды арттырып, Алланың ризашылығына бөленгеніміз абзал.
Адамдар той істеймін деп шамадан тыс ойын-сауық пен ысырапшылыққа, шариғатта тыйым салынған амалдарға баруы мүмкін. Қажеттілік туындап үйленуге ниет білдірсе, кешке некелері қиылып, Рамазан айынан кейін той жасағаны қайырлы.
Пайғамбарыз (с.а.у.) хадисінде: «Кімде-кім Рамазан оразасын иманмен, сауап үмітімен тұтса, оның өткен күнәлары кешіріледі» десе, тағы бірде «Ораза Мен үшін. Оның қарымын тек Мен беремін. Өйткені, ол тек менің разылығым үшін шаһуаттан және ішіп-жеуден бас тартты» деген құдси хадисті жеткізген.
Алланың берген мүмкіншілігін пайдаланып, сауапты амалды арттырғанымыз абзал. Рамазан айының қасиеттілігін құрметпен қарап, сақтағанымыз дұрыс.
Икрам АЙТАЕВ
