Сұрақ: Намаз оқитындардың да күнә жасауына не себеп?
Жауап: Бес уақыт намаз – балиғат жасына жеткен ақыл-есі дұрыс мұсылманға парыз. Намаз – пенденің Алла Тағалаға жақындауының, тақуалығының, рухани тазалығының негізгі өлшемдерінің бірі. Яғни, Жаратушыға деген шынайы ықыласының көрінісі.
Қоғамда намазхандар тарапынан да түрлі жағымсыз іс-әрекеттің жасалатынын көріп ұялатын кездер болады. Мұндай жағдайда мәселе дінде емес, адамда екенін білгеніміз дұрыс. Намаз оқып жүріп күнәға баратындар – құлшылықтың рухани мәнін толық түсінбей, оны тек сыртқы міндет ретінде орындайтындар. Сондай-ақ, нәпсісіне ерік беріп, тыйым салынған істерден бас тарта алмай жүрген адамдар. Шынайы ықыласпен орындалған амалдар қайырлы болмақ.
Мұндай іске баратындарды бірнеше топқа бөліп қарастыруға болады: Намазға немқұрайлық тантып, шынайы ықыласпен орындамай, тек күнделікті әдет ретінде оқитындар болуы мүмкін, намазды рияшылдықпен адамдарға жақсы тақуа көріну мақсатында оқуы мүмкін, күнделікті өтірік айту, өсек айту, әділетсіздік жасау сияқты күнәлардан арылмайтындар болуы мүмкін.
«Анкабут» сүресінің 45-аятында: «Намаз, шын мәнінде, арсыздық пен жамандықтан тыяды» деген. Намаз арқылы өз қателіктерін түсініп, жүрегін тазартып, құлшылық амалдарын істегенде Алладан сауабын үміт етіп, шынайы ықыласпен орындауға ұмтылу қажет.
Икрам АЙТАЕВ
