Ислам – тыныштық адамгершілік бірлік аманшылық және бейбітшілік діні, бірақ кейбір жат ағымдар бұл бейбітшілікті бұзғысы келеді. Жаман пиғылды жат ағымдар, ата-бабамыздан қалыптасып қаймағы бұзылмай келген салт-дәстүрімізді, әдет-ғұрыптарымызды, қазағыма майдай сіңген ислам дінін өздерінің адасқан көзқарасына қарай бұрмалап, адам баласын ой-санасын, дүниетанымын өзгертуге, басқа жаққа бұрмалағысы келетіні баршамызға айдан аңық.
Қазіргі кезде көптеген жастарымыз дінге бет бұрып, құлшылығын жасауда. Бірақ кейбір талабалар ұстаздардан алған ислами білімге қанағаттанбай өз бетінше ислами «саф» ілімді аламын, шариғатты толық меңгеремін деп, шетел асып, сол жақтағы біздің дүниетанымға сай келмейтін нәрселерді тықпалағысы келеді.
Көптеген ғасырлар бойы исламмен біте-қайнап қалыптасқан салт-дәстүрімізді, әдет-ғұрыптарымызды, соның ішінде беташар, келіннің атасы мен енесіне, туыс-туғандарға және жалпы әулетке сәлем беруі, домбыра тарту, қалжа, балаға ат қою, бесікке салу, ақиқа құрбаны, сонымен қатар қайтыс болған марқұмдарға Алла тағаланың шәриф кітабының ішіндегі сүрелерден болған сауапты бағыштау, дұға қылу, бетті сипау, намаздан соң таспих тарту, жамағатпен дұға жасау сияқты ихсан нәрселерді бидғатқа шығарып жүр.
Жат ағымның жетегіне кеткендер өкінішке орай ата-аналарына, ағайын-туыстарына қарсы шығып, намаз оқымаса, ораза ұстамаса, сен кәпірсің, сенімен араласуға болмайды бұл ширк, Аллаға серік қосу, бидғат, харам деп қазақтың дінитанымын ой-санасын улап, дөрекілік көрсетіп жүргені анық. Осыдан біраз жыл бұрын анасы жұма күніне арнайы жеті құдай нан пісіріп, ұлына «көршіге апарып бер» деп жұмсаған кезде баласы бұл ширк деп дөрекілік көрсетіп нан пісірген ыстық ыдыстағы қайнап тұрған майды бетіне төгіп жібереді. Алла сақтасын, ол бала жат ағымның тұзағына түскені белгілі болды
Құран кәрімде ата-ананға деген құрметтің ең биік шыңы баяндалады. Алла елшісі (оған Алланың игілігі мен сәлемі болсын) Сахих мүслимде келген хадисте туған-туыстарымен, жақындарымен ара-қатынасын үзген адам жәннаттың иісін де иіскей алмайтынын айтады. Жат ағымдардың соңына еліктеп кететіндердің көбін қарайтын болсақ, дүнияуи мен діни білімі төмен адамдар. Ал Пайғамбарымыз (оған Алланың игілігі мен сәлемі болсын) Бұхариде келген хадисте білім алуды әрбір мұсылман ер мен мұсылман әйелге міндет деген (ибн Мәжә).
Сонымен қатар қоғамда өз орнын таппаған, жағдайы нашар, ақыл-есі кемдеу, қамқорлыққа, ақшаға мұқтаж болғандар қазып қойған шұңқырға түсе қалады, сөйтіп ең бірінші ақшалай көмек көрсетіп, сенімдеріне кірген интернеттен өздері еліктеп жүген ұстаздардың уағыздарын тыңдаттырып, солардың сөздерін естіртіп оған тәуелді етіп қояды. Қазақстанда тыңдауға тыйым салынған, өздерін білімді шейх деп санап жүрген жат ағым өкілдерінің уағыздары интернетте көп. Солардың айтқан сөздері миына құйылып ішкі жан-дүниесін баурап алады, сөйтіп солардың қатарына қалай кіріп кеткенін сезбей қалады.
Олардың бәрі мұсылман иісі қазақ ұстанып жүрген ханафи мәзһабын, имам матуриди сенім мектебін мойындамайды. Қазақ халқының байырғы мәдениетінің тарихында айрықша орны бар ұлы ойшыл Қожа Ахмет Ясауи бабамызды, сонымен қатар көптеген танымал аталарымызды да құптамайды. Пайғамбарымыз (оған Алланың игілігімен сәлемі болсын) сахих хадисте бізге әрдайым жамағатпен бірге болуды және бөлінушіліктен сақтануды тапсырған.
Асылхан ЖАҚЫПОВ,
«Нұр-мүбәрәк» Египет ислам мәдениеті университетінің 2-курс магистранты
Қолданылған әдебиеттер
[1 исра сүресі, 23-24 аяттары]
[2] Ибн Сағд Мұхаммад әбу Абдуллаһ. ат-Табақатул-кубра, Бейрут. 1968
