Сұрақ: Ассалагму алейкум уа рахматулла! Рамазан айы мубарак болсын… Сурагым, рамазан айынын оразасында себебсіз аузынды ашса, әдейі бұзғандықтың жазасы ретінде бір құл азат етеді. Оған шамасы жетпесе, екі ай қатарынан үзбей ораза ұстауы керек. Оған да шамасы жетпесе 60 жоқ-жітікті тойдыруы қажет. диді сол дурыспа? Далелмен жазып бересіз бе? Алдын ала Рахмет, Алла Тағала разы болсын, жумыстарынызга!
Жауап:
Уа ғаләйкум әссәләм уә рахматуллаһи уә бәракәтуһ!
Шариғат әркімнің шама-шарқына қарай кәффарат өтеу жолдарын реттік тәртіппен бекіткен. Алдымен құл азат ету, бұған шама жетпесе, екі ай қатарынан ораза ұстау, бұған да шама жетпесе, 60 мұқтажды тамақтандыру. Бұл реттік тәртіп қатаң сақталуы қажет. Бірінші тәсілге шамасы жеткен кісіге жеңілдік іздеп келесі тәсілді қолдануы дұрыс емес. Шама жоқтығы нақты расталуы қажет. Сонда ғана келесі тәртіпті пайдалануға рұқсат етіледі. Әбу Һурайра:
«Бір кісі Пайғамбарға ﷺ келіп «Ей, Аллаһтың елшісі, құрыдым!», – деді. Ол: «Сені не құртты?», – деп сұрады. Ол: «Рамазанда (күндіз) әйеліме жақындап қойдым», – деді. Ол ﷺ: «Азат ететін құл таба аламысың?», – деді. Ол: «Жоқ», – деді. Ол ﷺ : «Екі ай бойы үзбей ораза ұстай аламысың?», – деді. Ол: «Жоқ», – деді. Ол ﷺ: «Алпыс міскінді тамақтандыратын нәрсе таба аламысың?», – деп сұрады. Ол: «Жоқ», – деді. Сосын Аллаһтың елшісі ﷺ біраз үндемей отырды. Сол уақытта оған біреу бір себет құрма әкелді. Пайғамбар ﷺ әлгі кісіге: «Мынаны садақа етіп тарат», – деді. Ол: «Бізден мұқтажырақ адам бар ма екен? Қаламыздың екі арасында орналасқан жұрттың ішінде бұл нәрсеге бізден мұқтажырақ отбасы жоқ шығар?», – деді. Мұны естіген Пайғамбар ﷺ жымиып, тіпті күрек тістері көрінді. Сосын оған: «Бар да, осы құрмамен отбасыңды тамақтандыр», – деді деген (Сахих Муслим:2/781).
