Бүгінгі Сенат отырысында депутат Нұртөре Жүсіп қоғамды алаңдатып отырған жат ағым проблемасына тоқталып, азаматтарымызды деструктивті діни ағымдардың ықпалынан қорғау үшін отандық заңнаманы жетілдіру қажеттігін атап өтті. Мәселе дабыл қағарлық деңгейге жеткенін айтқан ол елімізде дін ұстанушы азаматтардың орташа жасы азайып келе жатқанын және олардың 75 пайызы ашық интернет дереккөздерін пайдаланатынын жеткізді.
«Соның салдарынан біздің азаматтарымыз ұлттық құндылықтарымызға, салт-дәстүрімізге, дәстүрлі мәдениет пен өнерге қарсылық білдіру, мемлекеттік рәміздер мен кейбір мерекелерді құрметтемеу, заңмен белгіленген әскерде қызмет ету, орта білім алу сияқты ортақ міндеттерден, медициналық рәсімдердің кейбір түрлерінен бас тартуы сынды зайырлы қоғам талаптарына сай келмейтін қарсылықтар анық байқалып жатыр. Тіпті жастардың назарын жалпыға ортақ білімнен, парасатты пайымнан, заманауи құндылықтардан мына бұрмаланған таяз діни түсініктерге бұрып әкету әрекеттері де ашық жалғасып келеді» деді сенатор.
Премьер-Министр Әлихан Смайыловтың атына жолдаған депутаттық сауалында Нұртөре Жүсіп шетелдердің озық тәжірибесін зерделей отырып, қолданыстағы заңнаманы ұлттық дүниетанымды ескере отырып жетілдіруді, ұлттық құндылықтарды мемлекеттік деңгейде насихаттауды, БАҚ-та, мектеп және отбасында, қоғамдық институттарда кеңінен таным-түсінік жұмыстарын жүргізуді, Дін істері басқармаларын барлық өңірлерде бөлек басқарма ретінде қайта ашып, кадрлық әлеуетін артыруды, жастармен Дін проблемаларын зерттеу орталықтарының материалдық-техникалық әлеуетін арттырып, қызметкерлерінің жалақыларын көтеруді ұсынды.
