Бүгін елордамызда Ақпарат және қоғамдық даму министрлігінің ұйымдастыруымен І Орталық Азия медиафорумы басталды. Іс-шара 2 күнге созылады.
Форумның ашылуында ҚР Мемлекеттік кеңесшісі, саясаттанушы Ерлан Қарин Мемлекет басшысы Қасым-Жомарт Тоқаевтың I Орталық Азия Медиа форумына қатысушыларына арнаған құттықтау хатын оқып берді.
«Құрметті жиынға қатысушылар! Сіздерді бірінші Орталық Азия Медиа форумының басталуымен құттықтаймын. Бұқаралық коммуникациялар қарқынды дамыған қазіргі заманда медиа саласында тәжірибе алмасу және өңірдегі мәдени-гуманитарлық ынтымақтастықтың дамуы ерекше маңызды. Аймақтағы танымал журналистердің, сарапшылар мен медиа менеджерлердің басын қосқан форум мамандардың кәсіби пайымдарын бірлесе талқылауға мүмкіндік беретін бірегей пікірталас алаңы. Осы өлкедегі мемлекеттердің жан-жақты ықпалдастығы бауырмал халықтардың бай тарихы мен ортақ рухани мұрасына негізделген.
Биыл ағайын елдердің арасында дипломатиялық қарым-қатынас орнағанына 30 жыл толып отыр. XXI ғасырда Қазақстан Орталық Азиямен бірлесе дамуды көздейтін достық тату көршілік және ынтымақтастық туралы шартқа қол қою рәсімін осы мерейлі жылға бастауының зор символдық мәні бар. Стратегиялық құжат біздің жан-жақты серіктестігімізді нығайтуға тың серпін береді деп сенемін», – делінген Президенттің құттықтауында.
Медиафорумның бірінші күнгі отырыстарына еліміздің және алыс-жақын шетелдердің белгілі мамандары қатысты. Атап айтқанда, Түркияның 11-ші президенті Абдолла Гүл, Моңғолияның 3-ші президенті Намбарын Енхбаяр, қазақстандық әнші Димаш Құдайберген, саясаткер Әділ Ахметов, т.б. белгілі тұлғалар баяндама жасап, өз ойларымен бөлісті.
