Сұрақ: Оралда кәсіпкердің өмірін қиған қайғылы оқиға мені мынадай сұраққа алып келді: «Мұсылман адам осындай жауыздыққа қалай барады?»
Жауап: Сұраққа жауап берместен бұрын мынадай мәселені жақсы біліп алу қажет: жалпы терроризм немесе экстремизм, т.б. қылмыстық немесе жауыздық амалдардың тегі, діні болмайды. Адам ондай қылмысқа өзінің дүниетанымының таяздығынан, білімінің жетіспеушілігінен яки болмаса психологиялық ауытқуынан немесе (егер діндегі адам болса онда дін әмір еткендей бойындағы кемшіліктерін түземеген, ескі бұзық әдеттерін тәрбиелей алмаған) әдетінің салдарынан жасау мүмкіндігі жоғары.
Мысалы, дінге жаңа кірген адам бұрын бұзақы немесе ұрлықшы болған болса, онда өзін рухани тәрбиелеп жетілдіре алмаса, ол адам қанша жерден діндар болып көрінгенімен оны шынайы діндар деп айту қиын. Қазақ «ауру қалса да әдет қалмайды» деп бекер айтпаған.
Дін жолына түспей тұрып, болған әдеттен арылу үшін Құдайды тек ақылмен тану жеткіліксіз. Ол үшін адам адамгершілік құндылықтарды бойына сіңіру мақсатында көп еңбек етуі ләзім (нәпсімен қүресіп, тәрбиелейді).
Әйтпесе бұзақы адам, сол баяғы бұзақы, ұрлықшы сол ұрлықшы қалыптарында қала береді. Ал енді сөйтіп жүріп қылмыс жасаса, онда күнәһар мұсылман саналмақ. Ол үшін бұл дүниеде Заң алдында, ақыретте Құдай алдында жауапқа тартылмақ деп сенеміз.
Жалғас САДУАХАСҰЛЫ
