Сұрақ: «Суннамен жүресің бе?» деп сұрақ қою дұрыс па?
Жауап: Мұхаммед (с.а.у.) пайғамбардың ізбасарларынан кейінгі ғалымдар, Құран мен сүннеті халықтың дәстүрімен сабақтастырып, зерттеп дін негіздерін халыққа ұсынды. Ол кісілер имам Әбу Ханифа сынды мәзһаб ғалымдары еді.
Мәзһаб жолы – пайғамбарымыздың (с.а.у.) сүннет жолы екені ақиқат. Ал, соңғы жылдары араб еліндегі шейхтардың принциптерін пайғамбар жолы деп дәстүрлі Ислам дінін ұстанатын мұсылман қауымының санасын «суннамен жүресің бе?» деп улап жүргендер бар. Мұндай сұрақты қоятындар діни тақырыптарда таласушылар немесе белгілі бір діни ағым өкілдері.
Әдетте жат діни ағым өкілдері өздерін ғана «сүннетті толық орындаушы» ретінде санап, ізгілердің жолы деп мәзһаб ұстанушы мұсылмандардың намаз оқу әдісіне, киім киісін немесе сақал қоюын сынағысы келеді. Олар бұл тіркесті көбіне өз көзқарастарын жариялау үшін сұрақ ретінде қолдануын әдетке айналдырған. Қоғамда кездесетін мұндай жамағаттарды псевдосәлафилер деп атауға болады. Сондай-ақ, басқа да деобанд, жалған сопылық тариқаттар мен идеологиялық ағымдар солардың санатынан.
Ислам атын жамылған діни ағымдардың алдын алу мақсатында ҚМДБ-ның имамдары мен теологтардың еңбектерін ескерген жөн. Діни тақырыптарда ҚМДБ-ның дереккөздері мен отандық исламтанушы ғалымдардың кеңестеріне жүгінген абзал болады.
Икрам АЙТАЕВ
