Ақтауда ЮНЕСКО-ның Бүкіләлемдік мұралар тізіміне енген Маңғыстау облысындағы Шақпақ ата, Қараман ата, Шопан ата, Сұлтан епе және Бекет ата тарихи-мәдени ескерткіштерін сақтауға арналған өңірлік жұмыс кездесуі өтті.
Жиынға ҚР Мәдениет және ақпарат министрлігі, ҚР Ғылым және жоғары білім министрлігі, «Қазқайтажаңарту» РМК, жергілікті атқарушы органдар мен туристік ұйымдардың өкілдері қатысты.
Кездесуде ЮНЕСКО-ның Бүкіләлемдік мұра комитетінің 48 COM 8B.20 шешімін іске асыру және 2026 жылғы 29 шілдеде ҚР Вице-президенті Ерлан Қариннің төрағалығымен өткен кеңесте берілген тапсырмаларды орындау барысы қаралды.
Қатысушылар ескерткіштерді реттеу, олардың қазіргі жай-күйі туралы мәліметтерді жинақтау, бірыңғай электрондық деректер базасын құру, алдағы бес жылға арналған жұмыс жоспарын әзірлеу және тұрақты бақылау жүйесін енгізу мәселелерін талқылады.
«Қазқайтажаңарту» РМК бас директоры Олжас Шариязданов тарихи ескерткіштерді сақтауда барлық шараны жүйелі түрде жүргізудің маңызын атап өтті. Атап айтқанда, ол ескерткіштердің бастапқы қалпын сақтап, бүлінуіне жол бермеу, келушілер санын реттеу және тарихи-мәдени мұраны көпшілікке таныту қажет екеніне тоқталды.
Сондай-ақ 2026 жылғы 11-17 қазан аралығында өтетін «Үстірт: ландшафттар мен аң аулауға арналған арандар» номинациясын бағалау сапарына дайындық мәселесі қаралды. Бағалау жұмыстарын Ескерткіштер мен көрікті орындарды қорғау жөніндегі халықаралық кеңес (ИКОМОС) пен Халықаралық табиғатты қорғау одағының (ХТҚО) сарапшылары бірлесіп жүргізеді.
Еске салайық, «Үстірт» номинациясы Мемлекет басшысының 2024 жылы Ұлттық құрылтайдың III отырысында берген тапсырмасына сәйкес ұсынылды.
