Тәуелсіздіктің баянды болуы – тек экономикалық немесе саяси жетістіктермен ғана өлшенбейді. Ең басты көрсеткіш – елдің рухани әлеуеті, ұлттық құндылықтарды қадірлейтін, білімді әрі жауапты азаматтарының қалыптасуы. Сондықтан тәлімді ұрпақ тәрбиелеу – кез келген мемлекеттің болашағына салынған ең маңызды инвестиция.
Қазіргі қоғамда жастар жан-жақты ақпарат ағынының ортасында өмір сүріп жатыр. Интернет пен әлеуметтік желілер олардың дүниетанымына, өмірлік ұстанымдарына және құндылықтарына үлкен әсер етеді. Осындай кезеңде жастардың рухани иммунитетін қалыптастыру, олардың сыни ойлау қабілетін дамыту және ұлттық әрі адамзаттық құндылықтарды бойына сіңіру ерекше маңызға ие.
Теология тұрғысынан алғанда, шынайы руханият адамды жақсылыққа, білімге, сабырлылыққа, жауапкершілікке және қоғаммен үйлесімді өмір сүруге тәрбиелейді. Діни құндылықтардың негізгі мақсаты – адамды ізгілікке бағыттау, өзіне де, өзгеге де зиян келтірмейтін тұлға қалыптастыру. Сондықтан діни сауаттылық – тек діни білімді меңгеру ғана емес, дінді дұрыс түсіну, оны қоғамдағы бейбітшілік пен келісімді нығайтатын құндылық ретінде қабылдау.
Өкінішке қарай, кейбір жастар ақпараттың шынайылығын тексерместен, күмәнді діни мазмұндағы материалдарға сеніп жатады. Мұндай жағдайлар деструктивті діни идеологиялардың ықпалына түсу қаупін арттырады. Сол себепті жастарды ресми әрі сенімді ақпарат көздеріне жүгінуге, діни мәселелерде білікті мамандардың пікіріне сүйенуге дағдыландыру қажет. Бұл – діни қауіпсіздіктің маңызды тетіктерінің бірі.
Ұрпақ тәрбиесінде отбасының орны ерекше. Баланың бойындағы адамгершілік, еңбекқорлық, үлкенді сыйлау, жауапкершілік сияқты қасиеттер ең алдымен отбасында қалыптасады. Ал мектеп пен жоғары оқу орындары осы тәрбиені біліммен толықтырып, тұлғаның азаматтық ұстанымын қалыптастырады. Қоғамдық ұйымдар, бұқаралық ақпарат құралдары және діни институттар да жастардың дұрыс бағытта қалыптасуына өз үлесін қосуы тиіс.
Қазақстан – түрлі этнос пен дін өкілдері татулықта өмір сүріп жатқан мемлекет. Осындай қоғамдық келісімді сақтау үшін жастардың өзара құрмет, төзімділік және заңға бағыну мәдениетін қалыптастыру маңызды. Дәстүрлі рухани құндылықтар мен ұлттық салт-дәстүрлер жастардың бойында елге деген сүйіспеншілікті, туған жерге деген жауапкершілікті нығайтады.
Бүгінгі жас – ертеңгі маман, ата-ана, басшы және қоғам көшбасшысы. Сондықтан олардың білімді ғана емес, парасатты, мәдениетті және рухани кемел болып қалыптасуы – тәуелсіз Қазақстанның тұрақты дамуының басты кепілі. Саналы ұрпақ жалған ақпаратқа ермейді, қоғамның бірлігіне сызат түсіретін әрекеттерден аулақ болады және ел игілігі үшін адал еңбек етеді.
Қорытындылай келе, тәлімді ұрпақ тәрбиелеу – мемлекет, отбасы, білім беру ұйымдары және қоғамның ортақ жауапкершілігі. Рухани құндылықтарды, ұлттық тәрбиені және заманауи білімді үйлестіре білген жас буын ғана тәуелсіз еліміздің тұғырын нығайтып, оның жарқын болашағын қалыптастыра алады. Сондықтан әрбір жас өз білімін жетілдіруге, адамгершілік қасиеттерін дамытуға және қоғам алдындағы жауапкершілігін сезінуге ұмтылуы тиіс. Осындай ұрпақ қана ел тәуелсіздігінің сенімді тірегі бола алады.
Рахима ТАЛИПБЕКОВА,
“Сәтбаев қаласының дін сұрақтары бойынша ақпарат және кеңес беру орталығы” КММ теолог маманы,
Ұлытау облысы
