Сұрақ: Перзенттің жақсы болуы марқұм әкесіне сауап па?
Жауап: Дәстүрлі Ислам – ата-ананың дәрежесі мен орнын айқындап берген кемел дін. Әке жақсы игі-амалдар жасаса жән жақсы перзент тәрбиелеп өсірсе, екі дүниесінде қайырлы болады. Ислам дінінде перзенттің жақсы, адал, иманды, ізгі болуы марқұм әкесіне пайдасы тиетін амалдардың бірі. Сондықтан перзенттің иманды болып, жақсы өмір сүруі, марқұм ана-аналарына дұға жасауы, оның атынан садақа беруі, қарызы болса, өтеуге көмектесуі т.б. жақсы амалдары марқұмдарға сауап болып барады.
Ал, перзенті жаман жолға түсіп, адам мен қоғамға зиянды болса, күнә болады. Шынайы игі амалдарда Алланың ризашылығы мен берер сауаптары көп.
Пайғамбарымыздың (с.а.у.) хадисінде: «Адам баласы дүниеден өткен соң оның амалының барлығы үзіледі (тоқтайды), тек үш түрлі амалы үзілмейді: жария берген садақасы, артынан қалдырған пайдалы ілімі немесе оған дұға жасайтын салиқалы ұрпағы» деген.
Демек, игі ұрпақтарының марқұм болған әке-шешелері, ата-бабалары немесе өзге жақындарының атынан жасаған ізгі амалдарының сауабы тиеді екен. Жақсы игі-амалдармен жақсылыққа жете берейік.
Икрам АЙТАЕВ
