Сұрақ: Ата-анаға деген жақсылықтың қандай түрлері бар?
Жауап: Ислам дінінде ата-анаға деген үлкен құрмет пен ізет көрсетілген. Ата-анаға жақсылық жасау арқылы, Алланың ризалығына бөленесің. Ата-ананың батасынсыз рухани кемелдікке жете алмауың мүмкін. Жақсылыққа себепші болатын ата-анаға қызмет – баршаға міндет.
Ал, жаман жолдың түбі қасірет екенін ұмытпағанымыз жөн. Негізі, «балаға қандай тәрбие берсең соны көресің» деген сөз жай айтылмаған.
Ата-анаға жақсылық жасау мәселесінде қазақ халқының мақалдары мен Құран аяттары, хадистерінде кең баяндалған. Оларға құрмет көрсетудің мынадай түрлері айтылған: ата-анаға дауыс көтермей жақсы сөз айту, олардың алдында тәкаппарланбай үлкендігін құрметтеу, қартайса, ауырып қалса немесе басқа да қажеттіліктері болса жәрдем беру, қаржылай қамтамасыз ету, жалғызсыратып ренжітіп алмай көңілін табу, екі дүниенің жақсылығы үшін дұға ету, ата-ананың туыстарын сыйлау, ата-ана өмірден өтсе де туыстарымен байланысын өзбеу, т.б.
«Исра» сүресінің 23-аятында: «Раббың бір Өзіне ғана құлшылық етуді, ата-анаға барынша жақсылық жасауды үкім етті. Егер олардың біреуі немесе екеуі бірдей қолыңда қартайса, (оларды ауырсынып немесе жақтырмаған сыңай танытып) тіпті «Түу» деп те кеюші болма, сондай-ақ, оларға зекіп ұрыспа! Керісінше, оларға жанға жағымды жылы сөз айт!» деген.
Демек, ата-анаға қандай жақсылық жасасақ, қартайғанда сол жақсылықты көретінімізді ұмытпайық.
Икрам АЙТАЕВ
