Сұрақ: Исламда өмірдің қадірі мен мәні жайлы не айтылған?
Жауап: Өмір – Алланың адамзатқа берген ұлы нығметі. Адам нәпсісін тізгіндеп, рухани кемелдікке ұмтылса, өмірінің мәні кіреді. Ислам діні өмірді қадірлеуге, оны ізгі амалдармен, қайыр-жақсылықпен өткізуге үндейді. Ал, өмірдің қадірін білмей, нәпіс-құмарлықпен босқа өткізу – Исламда құпталмаған іс.
Ата-бабамыз адам ғұмырының ұзақ та берекелі болуын меңзеп «Ғұмырлы бол!» т.б. сынды жақсы сөздерді айтуы бекер емес. Әр саналы адам уақытты босқа өткізбей, өмірдің қадірі мен мәнін түсініп, оны дұрыс бағалауы үшін мынадай істерге мән бергені дұрыс: денсаулықтың қадірін білуі мен аманат деп қарауы, адамға берілген әрбір уақыт пен сәтті бағалай білуі, адамға пайдасыз мән-мағынасыз зиянды істерден сақтануы, адамдарға пайдалы қайырлы іс жасау, пайдалы білім мен кәсіп иесі болу, т.б.
Пайғамбарымыздың (с.а.у.) хадисінде: «Адамдардың жақсысы өмір жасы ұзақ әрі іс-амалы ізгі болғандары», десе, тағы бір хадисінде: «Адамдардың көбі қадіріне жете бермейтін екі нығмет бар, ол – денсаулық және бос уақыт», деген.
Демек, өмір – адамға бір рет берілетін мүмкіндік. Сол мүмкіндікті пайдаланып, бос қиялға берілмей, өмірді мәнді өткізу адамның өзіне байланысты дүние екен.
Икрам АЙТАЕВ
