Бойы 2 метр 5 сантиметр болатын Аяжан Амангелдиева – университеттің ғана емес, еліміздің намысын қорғап жүрген дарынды спортшы. Ол Сәрсен Аманжолов атындағы Шығыс Қазақстан университетінің дене шынықтыру және спорт білім бағдарламасын сәтті тәмамдап, дипломын алды.
Аяжан бес жасынан бастап волейболға қатысып, үлкен жетістіктерге жеткен-ді. Тынымсыз еңбек, жүйелі жаттығуының нәтижесінде еліміздің 3 дүркін чемпионы, Азия біріншілігінің күміс жүлдегері атанған.
Еске салсақ, шығыстың «Алтай» волейбол командасында, батыстың «Ақтөбе» командасында сәтті ойын көрсетті. 2025 жылдан бастап Аяжан өз бағытын баскетбол спортына бұрып, қазіргі таңда Алматы қаласының «Томирис» баскетбол клубында өнер көрсетіп жүр.
«Бүгін қолыма дипломымды алып, үлкен өмірге қадам басып отырмын. Осы уақыт ішінде білім берген, ілім берген ұстаздарыма, университет ұжымына алғысымды айтамын. Ендігі кезекте алған білімімді елдің дамуына қосамын», дейді университет түлегі Аяжан Амангелдиева.
Аяжанның оқу мен спортты қатар алып жүруі – барша жасқа үлкен үлгі. Аталған университет ұжымы осындай талантты жастарға әрқашан қолдау көрсетіп, олардың армандарына жетуіне жағдай жасап отыруға тырысады.
Айтулы күнде Аяжанды оқуын сәтті аяқтауымен ұстаздары да құттықтап, спорттық және кәсіби мансабында биік шыңдарды бағындыра беруін тіледі. Осылайша, еліміздің ең ұзын бойлы түлегі дипломын алып, еңбек жолын бастауға бет бұрды.
