Ұлыбританияның Болтон қаласында имамның өзі отбасымен бірге тұратын үйіне «Молотов коктейлі» қолданылған шабуыл жасалды. Оқиға салдарынан зардап шеккендер жоқ.
Үлкен Манчестер полициясының мәлімдеуінше, 10 маусым күні жергілікті уақыт бойынша сағат 21:20-да Болтонның Шарплс ауданындағы тұрғын үйді қасақана өртемек болғаны туралы хабарлама түскен.
Полиция бұл оқиғаны «нысаналы түрде жасалған шабуыл» ретінде қарастырып отыр. Қазіргі уақытта оқиға бойынша тергеу басталды, алайда күдіктілер әлі ұсталған жоқ.
Полицияның мәліметінше, шабуыл 42 жастағы имам Хассан Пателдің үйіне жасалған. Ол аталған үйде жұбайымен, төрт баласымен және жиенімен бірге тұрады. Оқиға кезінде үйде болған жеті адамның ешқайсысы зардап шеккен жоқ.
