Сұрақ: Құранда жәндіктер жайлы не айтылған?
Жауап: Құран кәрімде түрлі жануарлар, жеміс-жидектер мен жәндіктердің аттары зікір етілген. Құранда аты аталған жәндіктер – маса, шыбын, ара, құмырсқа, көбелек, шегіртке, т.б.
«Бақара» сүресінің 26-аятында: «Алла (ақиқатты жеткізіп, құлдарының жүрегіне иман нұрын ұялату үшін) масаны, тіпті одан да кіші немесе үлкен жаратылысты мысал етіп беруді ар көрмейді», деген.
«Хаж» сүресінің 73-аятында: «Уа адамдар! Сендерге мынадай бір мысал келтірілді, соған құлақ асыңдар! Сендердің Алладан басқа тәңір тұтып, жалынып-жалбарынғандарыңның барлығы бірігіп, жұмыла кіріссе де бір шыбын жарата алмайды», деген.
Сондай-ақ, Нахл (Ара), Нәмл (құмырсқа) сынды сүре аттары да бар.
Жәндіктердің аталуындағы мақсат – тек табиғат туралы мәлімет беру емес, Алланың құдіретін көрсету, адамның табиғатқа қарап ғибрат алуына, өз әлсіздігін сезінуіне ықпал ету, тарихи оқиғаларды баяндау, адамға ой салатын, рухани және тәрбиелік мағынасы бар мысалдар ретінде келтіріледі.
Икрам АЙТАЕВ
