Сұрақ: Құран аяттарын сауатсыздықпен пайымдаудың салдары қандай?
Жауап: Арабша сауатым бар деп, Құран аяттарын өзінше түсіну дұрыс шешім емес. Ілімсіз өзінше жорамал жасаудың салдары ауыр. Діни ілімнен хабары жоқ адам Құран аяттарын бұрыс мағынада түсініп, өзін де, өзгені де адастырады. Шариғатты тек тыйымдар мен жазалаудан тұратын қатыгез жүйе ретінде көретіндер, өзге діни көзқарастағы адамдарды, тіпті жақындарын «адасқандар» деп айыптайтындар, қоғамда діни алауыздық тудыратындар осыдан шығып жатыр.
Құран аяттарын шынайы пайымдау үшін Ислам ғалымдары бекіткен шарттар бар: араб тілінің грамматикасы мен шешендік өнер ілімін, аяттардың түсу себептері, үкімі жойылған және жойған аяттар тәртібі, хадистер ілімі т.б.
Құран кәрімді дұрыс пайым жасау үшін өз бетінше әрекет етпей, ҚМДБ ұсынған сенімді, білікті ғалымдардың тәпсірлеріне жүгіну қажет. Пайғамбарымыз (с.а.у.): «Кімде-кім Құранды білімсіз тәпсірлейтін болса, тозақтан өз орнын дайындай берсін», деген.
Демек, надандықпен, білімсіз, соқыр сеніммен дін үйренудің адам мен қоғам үшін зардабы өте ауыр.
Икрам АЙТАЕВ
