Сұрақ: Нәпіл намаздардың пайдасы бар ма?
Жауап: Нәпіл – арабтың қосымша, артық деген мағынасын білдіретін сөз. Парыз бен уәжіп намаздардан басқа пайғамбарымыздың (с.а.у.) оқыған сүннет және нәпіл намаздары бар.
Нәпіл – бес уақыт парыз намаздардан тыс оқылатын ерікті құлшылық түрі. Бұған сүннет намаздар, «таһажжұд», «дұха» (сәске), «истихара», «тәхиятул-мәсжид» т.б. сияқты намаздар жатады. Нәпіл намаздарды оқудан мақсат Аллаға жақындау, сауаптардан үміт ету, намаздағы кемшіліктерді толықтыру, дұғаларды арттыру, рухани тәрбие, пайғамбарымыздың (с.а.у.) сүннеттерін орындап, мөл сауапқа бөлену.
Нәпіл намаздарын орындаушы сауап алады, ал орындамаған адамға күнә жазылмайды. Сондай-ақ, хадистерде Қиямет күні парыз құлшылықтардағы кемшіліктер осы нәпіл амалдардың сауабымен толықтырылады деген хабарлар бар. Парыз бен уәжіп намаздардың орнын басады деп, намазға немқұрайлы қарауға болмайды. Әр намаздың орны бөлек.
Пайғамбарымыздың (с.а.у.) хадисінде: «Қиямет күні адамның алғаш есепке тартылатыны – парыз намаздары. Егер осы намазды толық орындаса, неткен тамаша? Керісінше жағдайда: «Қараңдар, нәпіл намазы бар ма екен? Егер нәпіл намазы болса, парыздардың кемістігін осы намаздармен толтырыңдар. Бұған кейінгі басқа парыздар да дәл осылай жасалады», деген.
Демек, әр оқылған құлшылық намаздардың рухани пайдасы мен сауабы мөл екен.
Икрам АЙТАЕВ
