Сұрақ: VIP қажылық ысырап емес пе?
Жауап: Қажылық – мұсылмандар үшін қасиетті құлшылық түрі. Елімізде жылда мыңдаған азамат қажылық сапарын орындайды. Үлкен қажылық Зул-хиджа айында орындалады. Басқа айларда ұмра (кіші қажылығы) рәсімі орындала береді.
Қажылыққа ниеттенгендер үшін жол, қонақ үй, қосымша қызмет түрлері қаржысына қарай қарастырылған. VIP қызмет түрін адамдар арасында ысырыпқа балап, түрлі көзқарастарын білдіріп жатқаны жасырын емес. Егер адамның ниеті қажылықта сән-салтанатты таңдау, мақтану, өзгеден артық көріну үшін болса, VIP түрі құпталмаған іс болады. Ал, адамның мүмкіндігі бар болса, қауіпсіздігі, денсаулығы немесе ыңғайлылық үшін болса, дінде мәселе жоқ.
Қасиетті мекенде бай да, кедей де ихрамда бірдей күйге түсіп, бірдей діни рәсімдерін орындайды. Айырмашылық тек қауіпсіздік пен ұйымдастыру деңгейінде ғана. Демек, адамның ысырап пен менмендікке бой алдырмай, өзіне лайықты деңгейде, адал малымен жайлылықты таңдауында тыйым жоқ. Шынайы құлшылықпен орындалған амалдарыңыз қабыл болсын!
Икрам АЙТАЕВ
