6 мамыр күні Астана қаласында Жеңістің 81 жылдығы мен Отан қорғаушы күніне арналған «Таусылмас тағзым» атты театрландырылған концерт өтті. Тағылымы мол мәдени іс-шараны Сарыарқа ауданы бойынша Белсенді ұзақ өмір сүру орталығы аудан әкімдігі мен ардагерлер кеңесінің қолдауымен ұйымдастырды.
Мерекелік кештің басты ерекшелігі – «Соғыс көлеңкесі» атты театрландырылған композиция болды. Қойылымды орталықтың өнерпаз зейнеткерлері хореограф Әлия Абылкасымованың жетекшілігімен сахналады. Сахналық көріністе соғыс жылдарының ауыртпалығы, майдандағы ерлік пен тылдағы еңбек, аналардың сағынышы мен сарбаздардың қайсар рухы көркем бейнеленді. Бұл қойылым көрерменді өткен тарихқа жетелеп, бейбіт күннің қадірін терең сезінуге мүмкіндік берді.
«Бүгінгі театрландырылған көрініске 45 зейнеткер қатысты. Өнерпаздар би қимылдары арқылы соғыс жылдарындағы ауыртпалықты, қазақ ауылдарының тұрмысын, тыл еңбеккерлерінің еңбегін, қаралы хабардың жетуін және Жеңістің қуанышын жеткізуге тырысты. «Соғыс көлеңкесі» композициясын би үйірмесінің жетекшісі Әлия Талғатқызы бір айға жуық уақыт дайындады. Жалпы Сарыарқа ауданының өнерлі ата-әжелері мерекелік концертке 20-ға жуық музыкалық номер әзірледі», – деді орталықтың мәдени ұйымдастырушысы Айару Бақытова.
Батырлық пен ерлікке арналған кеште Сарыарқа ауданы бойынша әлеуметтік қызмет көрсету бөлімінің басшысы Кенжеболат Бапишев, тыл еңбеккерлері, ауған соғысының ардагерлері мен ардагерлер кеңесінің өкілдері жүрекжарды лебіздерін білдірді.
Кеш барысында майдан даласында шырқалған әндер орындалып, батырларға тағзым жасалды. Атап айтқанда, «Бейбіт күннің тілегі», «Идет солдат по городу», «Смуглянка», «Жди меня», «Журавли», «Синий платочек» сынды туындылар көрерменге ұсынылды. Бұл әндер арқылы сол бір сұрапыл жылдардың рухы қайта жаңғырып, ерлікке деген құрмет арта түсті.
Сонымен қатар, мерекелік бағдарлама аясында «Әгугай» этно-фольклорлық ансамблі, «Шабыт», «Әдемі дәуір», «Гауһартас» би ұжымдары және өзге де өнерпаздар өнер көрсетті. Әрбір шығармашылық номер кештің мазмұнын байытып, көрерменге көтеріңкі көңіл күй сыйлады.
«Мұндай іс-шаралардың басты мақсаты – Ұлы Отан соғысы ардагерлерінің ерлігін ұлықтау, кейінгі ұрпаққа патриоттық тәрбие беру және бейбіт өмірдің қадірін насихаттау. Мамыр мерекелеріне арналған мәдени, патриоттық іс-шаралар Белсенді ұзақ өмір сүру орталықтарының барлық филиалдарында ұйымдастырылады. Ескерткіштерге гүл жоқтарын қою, қайырымдылық себептерін сыйлау, ерлік сабақтарын өткізу, мерекелік концерттер сияқты 20-ға жуық шара өтеді» -деп сөзін түйіндеді әлеуметтік қызметтерді ақпараттық ілгерілету бөлімінің басшысы Меруерт Нұрғалиева.
Концерттік бағдарламаны қала тұрғындары, тыл және ауған соғысының ардагерлері, зейнеткерлер тамашалады.
«Таусылмас тағзым» концерті – аға буынның өнегелі өмірі мен ел тарихына деген құрметінің жарқын көрінісі болды.
