Бұл өмірде біздің көптеген тілегіміз бен қалауымыз бар. Тек тілек тілеп, қалауларымызды тілге тиек етеміз. Яғни тек ойлап қана қоя салу біздің армандарымыздың орындалуына жеткіліксіз екенін де білуіміз керек.
Дінде бұның ең жақсы дәлелі – Зәмзәм суы! Алла тағала Ажар анамызға Сафа мен Мәруа төбелерінің арасында жеті рет барып келгеннен кейін ғана «Зәмзәм суын» берді. Егер Алла Тағала қаласа, Исмаил пайғамбарымыз су сұрап жылаған кезде ешқандай себепсіз, күреспей немесе тер төкпей «Зәмзәм суын» бұлақтан ағызып жіберер еді. Бірақ Алла бұлай жасамады! Ажар анамыз Сафа мен Мәруаның арасында ары-бері терлеп, мазасыздықпен, үміт және қорқынышпен жүгірді.
Олай болса, дұрыс ой, дұрыс пікір мен қалау, дұрыс мақсат қою жеткіліксіз. Зәмзәм суының берілу оқиғасы секілді, әрбір жетістік жолында жүректе үміт, тілде дұға және денеде күш-жігермен қоса алғанда амалболуы міндет.
Исатай БЕРДАЛИЕВ
