Өнердің адамзатпен қозғалыс, пластика, ырғақ пен сезім арқылы тілдесе алатын зор құдіретін айшықтайтын мереке. Қазақстан үшін би өнері сахналық бағыт қана емес, халқымыздың бай мәдени мұрасын, терең тарихы мен дәстүрін, ұрпақтар сабақтастығын танытатын қастерлі өнер саласы. Хореография арқылы ұлттық болмысымыздың көркем бейнесі жаңғырып, түп-тамырымызбен байланыс нығаяды, жас ұрпақтың төл мәдениетке деген қызығушылығы арта түседі.
Бұл ретте би өнері саласындағы кәсіби білім беру жүйесінің орны ерекше. Отандық хореографияның дамуы мықты кәсіби мектептерге, білікті кадрлар даярлау ісіне тікелей байланысты. Қазақ ұлттық хореография академиясы, А. Селезнев атындағы Алматы хореографиялық училищесі және басқа да профильді оқу орындары осы бағытта маңызды рөл атқарып келеді. Дәл осы білім ордаларында ұлттық сахнаның үздік дәстүрлерін жалғап, оны жаңа мазмұнмен байытатын артист, педагог және балетмейстерлердің жаңа буыны қалыптасуда.
Бүгінде еліміздің би мектебі қарқынды дамып, Қазақстанда ғана емес, шетелдік сахналарда да жоғары деңгейде өнер көрсетіп келеді. Мәселен, өткен жылдың өзінде «Бірлік» ансамблі 63 концерт қойып, шамамен 100 мың көрерменді қамтыды. «Гүлдер» ансамблі 44 концерт өткізді. «Салтанат» мемлекеттік би ансамблі 86 рет сахнаға шығып, 150 мыңға жуық көрерменге өнер көрсетті. Ал, отандық хореография дәстүрін, соның ішінде қазіргі қазақстандық балеттің негізін қалаушылардың бірі, көрнекті балетмейстер Болат Аюхановтың шығармашылық мектебін жалғастырып келе жатқан Қазақстан Республикасының Мемлекеттік академиялық би театры 37 іс-шара өткізді.
Құрметті достар! Барша артист, хореограф, педагог, балетмейстер, шығармашылық ұжым жетекшілері мен сахна ардагерлерін Халықаралық би күнімен шын жүректен құттықтаймын! Сіздерге зор денсаулық, сарқылмас шабыт, өнер жолында жаңа жетістіктер, толайым табыс пен бақ-береке тілеймін!
ҚР Премьер-министрінің орынбасары – Мәдениет және ақпарат министрі Аида Балаева
