Сұрақ: Діндегі әулие түсінігі қандай?
Жауап: «Әулие» сөзі жақын, дос, қорғаушы деген мағыналарды береді. Әулие ұғымы – Ислам дінінен енген, қазақтың бай рухани дүниесімен үйлескен сөз. Ол Аллаға жақын, оның әмірін орындаушы адам, сүйікті құлы, қасиетті адам, тақуа адам, керемет иесі деген ұғымда қолданады.
Қазақ дүниесінде ерекше күшке ие рухани ұстаздар, діндар, әділ, жұртқа шипа беретін, керемет иесі ретінде қолданған. Сондай-ақ, Қожа Ахмет Ясауи, Арыстан бап, Бекет ата, т.б. сынды жерленген жері киелі саналатын тұлғалар ретінде танылады.
Ислам тарихында есімдері ел арасында әулиелігімен танымал болған тұлғалар көп. Пайғамбарымыз (с.а.у.) хадисінде: «Егер Алла бір құлын жақсы көрсе, Жәбірейіл періштеге былай дейді: «Расында, Алла пәлен деген құлды жақсы көрді. Сен де оны жақсы көр». Сонда ол құлды Жәбірейіл періште де жақсы көреді де, сосын аспан әһліне (періштелерге) былай деп жар салады: «Алла пәлен құлды жақсы көрді. Сендер де сол адамды жақсы көріңдер». Сөйтіп аспан әһлі сол пендені жақсы көреді. Содан кейін жер бетінде оған деген сүйіспеншілік жүректерде орнығатын болады» деген.
Демек, мұсылман адам білімімен, жақсы құлшылық амалдарымен Алланың сүйікті құлы бола алады.
Икрам АЙТАЕВ
