Сұрақ: Исламдағы орта жолды ұстану деген не?
Жауап: Мұсылман адам дінді дұрыс ұстай алса, қасиеті болады. Дұрыс пайымдамай, Алланың қалауы осы екен деп фанатизмге бой алдырса, қасірет шегеді. Ислам дінінің мақсаты – адамдарға қиындық туғызу емес, жеңілдік жасау. Исламдағы орта жолды ұстану шектен шығып кетуден сақтайды.
Орта жол дегеніміз – Алланың бұйырған амалдарын орнымен орындап, шектен шықпау, тепе-теңдікті сақтау және барлық істе әділетті ұстану.
Фанатизмге бой алдырмай, орта жолды ұстану – пайғамбарымыздың (с.а.у.) бұйырған жолы. Кейбір азаматтар діннің мән-мазмұнына үңілмей, сенімде (ақидада) шектен шығып, тұлғаларды ұлықтап немесе оларды жоққа шығарады. Ғибадатта шектен шығып, шамаға қарамай өзін қинап, ұйқысыз түндерді өткізіп, отбасына мән беруден қалады. Мал-мүлікте шектен тыс ысырап етіп немесе тым сараңдық танытып жатады. Қарым-қатынас мәселесінде құлшылық ғибадатын немесе т.б. дүниелерді негіз етіп, Алла үшін жек көремін деп қатынасты үзіп қояды. Мұндай жағдайларда мәселе дінде емес, адамда болатынын ұмытпайық.
Бірде үш сахаба пайғамбарымыз (с.а.у.) ғибадатына таң қалып, бірі: «Мен түн бойы ұйықтаймын намаз оқимын», екіншісі: «Мен өмір бойы ораза тұтамын», үшіншісі: «Мен әйелге үйленбеймін» дейді.
Сонда Пайғамбар (с.а.у.): «Кім менің сүннетімнен бас тартса, ол менен емес. Мен ораза да тұтамын, ауыз да ашамын, намаз да оқимын, ұйықтаймын да, үйленемін» деген.
Демек, шамадан тыс діндарлыққа бой алдыру дұрыс еместігін аңғаруға болады.
Икрам АЙТАЕВ
