Бүгін Алматы Орталық мешітінде Қазақстан мұсылмандары діни басқармасының төрағасы Наурызбай қажы Тағанұлының қатысуымен «Мектепке жол-2025» қайырымдылық шарасы өтті.
Іс-шара барысында Бас мүфти оқушыларды жаңа оқу жылының басталуымен құттықтап, білім мен ғылымның артықшылығы жайында насихат айта келе, балаларды жақсы оқуға, ізденімпаз болуға шақырды.
«Қазақ халқы ежелден кеңпейілдігімен,жомарттығымен ерекшеленген халық. Ислам діні балаларға қамқор болуға үндейді. Демек, баланың көңіліне қуаныш сыйлау – үлкен сауапты іс. Бүгін де өздеріңізге қуаныш сыйлауға арнайы келіп отырмыз. Біздің бір баланы демеп, оны мектепке дайындауымыз мүмкін болашақ бір ғалымға жасаған көмегіміз шығар.
Біз «Зекет және қайырымдылық» қорының ұйытқы болуымен «Мектепке жол» акциясы аясында өткен жылы 26 мың оқушыны мектепке дайындадық. Биыл да осы көрсеткішке жету жоспарлануда. Қазіргі уақытта акция аясында оқушыларға мектепке қажетті оқу құралдары мен сөмкелер үлестірілуде. Бұл бағыттағы жұмыстар қыркүйек айына дейін жалғасатын болады. Игі іске үлес қосқан барша демеуші азаматтарға Алла разы болсын», – деді Наурызбай қажы Тағанұлы өз сөзінде.
