Ресейде жұбайлардың опасыздығы және балалы отбасынан кету үшін айыппұл енгізу ұсынылып жатыр. Мұндай бастаманы Федералдық қауіпсіздік және сыбайлас жемқорлыққа қарсы күрес жобасының жетекшісі Виталий Бородин айтып отыр.
«Көзге шөп салу үшін 15–20 мың рубль, ал отбасын тастап кеткен адамға әрбір бала үшін қосымша 50 мың рубль айыппұл салуды ұсынамын. Егер отбасының бұзылуына ата-ананың біреуі кінәлі болса, ол қаржылай жауапкершілікті көтеруге тиіс», — деді ол.
Бородиннің пікірінше, бұл шаралар адамгершілік пен отбасылық құндылықтарды нығайтуға, сондай-ақ ажырасудан кейін күйзеліске түскен балалардың жаман ортаға түсіп, қылмысқа баруын азайтуға ықпал етуі керек.
«Бүгінде отбасы құндылықтары аяқ асты болып жатыр — адамдар оңай үйленіп, оңай ажырасады», — дейді ол.
Бородин Біріккен Араб Әмірліктері мен Еуроодақтың табысты тәжірибесіне сүйенуге шақырды, бұл елдерде осындай істер үшін ірі айыппұлдар қарастырылған. Ол екі ата-ана да отбасы жағдайына қарамастан балаларды толық қамтамасыз етуге міндетті екенін атап өтті.
