ҚМДБ Жетісу облысы өкілдігінің орталық «Иман» мешітінде «Мектепке жол» қайырымдылық акциясының қорытынды шарасы өтті.
Қасиетті Құран аяттарымен басталған игі жиында ҚМДБ Жетісу облысының Бас имамы Керімбек Сәрсембайұлы мен «Зекет және қайырымдылық» қорының өңірлік меңгерушісі Хадысұлы Омар құттықтау сөз сөйлеп, жас ұрпақтың білімді болып өсуінің маңыздылығына тоқталды. Олар балаларға жаңа оқу жылында табыс тілеп, демеушілік жасаған жандарға ризашылық білдірді.
Қайырымды азаматтардың қолдауымен жиналған қаражат есебінен «Ана жүрегі» мүгедектер бірлестігі, «Ерекше жандар» қоғамдық қоры, «Қазақ саңыраулар қоғамы» бірлестігі мүшелерінің балаларына, сондай-ақ қала маңындағы әлеуметтік аз қамтылған және көп балалы отбасылардан шыққан 200 оқушыға оқу құралдары салынған сөмкелер табысталды.
Жалпы облыс бойынша 1345 оқушы мектепке қажетті құрал-жабдықтармен қамтылды. Сонымен қатар 160 балаға аяқ-киім, 50 оқушыға мектеп формасы берілді.
Шара соңында «Иман» мешітінің ұжымы атсалысқан барша азаматтарға алғыс білдіріп, балалардың қуанышы үшін еңбек еткен демеушілерге Алла Тағаланың берекесін тіледі.
