Сұрақ: Дұғам неге қабыл болмай жатыр?
Жауап: Адам Аллаға мұқтаждығына байланысты дұға-тілек жасайды. Кейде асығыстық қылып, дұғамды қабыл алмады, орындалмады деп реніш білдіретіндер де кездеседі. «Дұға жасадым, енді міндетті түрде орындалуға тиіс» деген талап исламға жат түсінік. Мұндай ойдан арылғанымыз дұрыс.
Пайғамбарымыздың (с.а.у) хадисінде: «Сендердің бірің: «Тілегенімді қайтейін, тілегім қабыл болмай жатыр» деп асықтырмаған дұғаларың қабыл» деген.
Құран аяттарында Алла өзіне жасалған дұға-тілектеріне жауап беретінін баяндаған. Дұға-тілектің қабыл болып, болмауы Алланың қалауымен жүзеге асады. «Бақара» сүресінің 216 аятында: «Жек көрген нәрселерің сендер үшін қайырлы болуы мүмкін. Ал жақсы көрген нәрселерің сендер үшін жаман болуы мүмкін. Алла біледі, сендер білмейсіңдер» деген.
Жасаған дұғаңыздың өзіңіз үшін қайыры бар шығар. Сондықтан кейбір сұраған нәрселеріміз берілмеді деп реніш білдірмегеніміз абзал. Алла хикмет иесі екенін ұмытпаңыз!
Икрам АЙТАЕВ
