Сұрақ: Жат діни ағымдар адамды қалай арбайды?
Жауап: Жат діни ағымдардың өкілдері адамдарды өз қатарына тарту мақсатында түрлі айла-тәсілді қолданады. Адамның санасына әсер ету арқылы өз идеологияларын сіңіреді. Олар адамның әлсіз сәтін пайдалануға бейім болады.
Әдетте діни ағым өкілдері адамның қайғыға, күйзеліске, жалғыздыққа, жұмыссыздыққа кез болған кезде мейірімділік танытып, қолдап «шынайы жол» деп өздерінің рухани дүниесін ұсынады. Мейірімділік таныту барысында материалдық көмек, шетелде тегін оқу мүмкіндігін ұсынып, Құран аяттары мен хадис секілді діни кітаптардан үзінділер келтіріп, оларды өз мүдделеріне сай бұрмалап түсіндіреді. Үгіт-насихаттарының түпкі мақсаты – отбасы, достарынан алыстатып, қоғаммен байланысын үздіру.
Мұндай жағдайларда адам сенгіш, еліктегіш, эмоционалды түрде әлсіз болады. Сондай-ақ, діни уағыздарында «бақытты боласың», «рухани тазарасың», «жұмаққа жол ашылады» деген сынды негізсіз уәделердің саны артады. Адам санасына әсер етіп, осы дін жолы арқылы күнәдан арылған сияқты сезімде жүріп олардың ықпалында болады.
Осы орайда отандастарымызға негізсіз діни ақпараттарға еліктемей, діни ақпараттарды сенімді қайнарлардан алу керектігін ескертеміз.
Икрам АЙТАЕВ
