Сұрақ: Құрбандық шалуда қандай сауап бар?
Жауап: Құрбандық – Алланың ризашылығына жақындау ниетімен шалынатын арнайы малдың аты. Құрбан айттың бірінші күні айт намазынан кейін басталып, айттың үшінші күні ақшам намазына дейін жалғасатын амал.
Ханафи мәзһабында құрбан айт күндері қой, ешкі, сиыр, түйе малдарынан шамасы келгендерге бір адам немесе бірнеше адам болып құрбандық шалу – міндет. Бұл Алланың арнайы әмірі болғандықтан оны ықыласпен орындаушыға мол сауап бар. Құрбандыққа шалынған малдың етін бөліп көршілеріне, кедей-мұқтаж адамдарға, өзінің отбасына, бала-шағасына берсе болады.
«Хаж» сүресінің 37-аятында: «(Шындығына келсек) құрбандыққа шалған малыңның еті де, қаны да Аллаға жетпейді. Оған сендерден жететін тек тақуалық қана» десе, Пайғамбарымыз (с.а.у.) хадисінде: «Сахабалар пайғамбарымызға (с.а.у.):
– Уа, Алланың Елшісі, құрбандық деген не? – деп сұрақ қойды.
– Құрбандық – сендердің Ибраһим (а.с.) бабаларыңның сүннеті, – деді.
– Одан бізге қандай сауап бар?
– Әрбір тал қылшығы үшін сауап аласыңдар.
– Қойдың жүнінен ше?
– Қойдың жүнінің әрбір тал қылшығына да сауап жазылады» деген.
Алла біздің шалған құрбандығымыздың ағызылған қанына немесе етіне мұқтаж емес екен. Бізге бұйырылған амалдарын орындап Алланың ризашылығына бөлену – міндетіміз.
Икрам АЙТАЕВ
