Сұрақ: Исламда денсаулық жайлы не айтылған?
Жауап: Уақыт пен денсаулық – Алланың берген нығметі мен аманаты. Ислам дінінің мақсатының бірі – адамның денсаулығын сақтау. Денсаулығы мықты адам жұмыс істейді, нәпақасын табады. Денсаулығына қиянат жасаған адам күнәға батып, қиындыққа душар болады. Нәтижесінде өкінішке түсіп, опық жейді. Сондықтан ауруға кез болмай, дәрігерлердің кеңесіне жүгініп, денсаулықтың қадірін білген дұрыс.
Пайғамбарымыз (с.а.у.) былай деген: «Мына бес нәрсе келместен бұрын бес нәрсенің қадірін біл: ауру келместен бұрын денсаулықтың, жұмысбасты болмастан бұрын бос уақыттың, қартаймастан бұрын жастықтың, кедей болмастан бұрын байлықтың, өлім келместен бұрын өмірдің», десе, тағы бір хадисте: «Адамдардың көбі қадіріне жете бермейтін екі нығмет бар, ол – денсаулық және бос уақыт», – деген.
Ислам құптамайтын денсаулыққа зиянды нашақорлық, ішкілік, шылым шегу т.б. амалдардан сақтанып, салауатты өмір сүру салтын сақтау – қайырлы іс.
Икрам АЙТАЕВ
