Сұрақ: Ата-ананың ақысы қандай?
Жауап: Дәстүрлі Ислам – кемшіліксіз, әділдік пен ақиқатты үйрететін дін. Ол пенденің жақсылыққа жетуі мен ізгілігін көздейді. Кейде әлеуметтік желілерде ашуға ерік беріп, ата-анасына құрметсіздік көрсетіп, дөрекі сөздерді айтып жатқандарды аңғаруға болады. Ата-ананың теріс батасын алудан Алла сақтасын. Қандай жағдай болса да оларға құрмет көрсету – міндет.
Алла Тағала ата-анаға лайықты құрмет пен жақсылық жасауды Өзінен кейінгі орынға қойған. Ата-ананың разылығы Алланың разылығында екенін ұмытпағанымыз жөн.
«Исра» сүресінің 23-аятында: «Раббың тек қана өзіне құлшылық жасауды, әке-шешеге жақсы қарауды бұйырды. Ал егер олардың бірі немесе екеуі қолдарыңда тұрған кезде қартайса, оларға «түһ» деп те айтпа. Сондай-ақ, оларға сыпайы сөйле және оларды зекіме. Оларға мейіріммен құшақ жайып, былай деп жаса: «Уа, Раббым! Олар мені кішкентай күнімде қалай мәпелеп өсірген болса, оларды солайша мейіріміңе бөлей гөр». Пайғамбарымыз (с.а.у.) хадисінде: «Алланың разылығы ата-ананың разылығында, Алланың ашуы ата-ананың ашуында» деген.
Ата-анаға жақсылық жасау, батасы мен ризашылығын алу – перзентке міндет.
Икрам АЙТАЕВ
