Сұрақ: Сәресін ішпей ораза тұта берсе бола ма?
Жауап: Сәресін ішуде береке бар. Рамазанның оразасы немесе басқа уақыттардағы нәпіл, сүннет оразаларда да сәресі асын ішу қажет. Яғни, сәресін таң намазының кіруіне аз уақыт қалғанға дейін ішіп, ауыз бекіту абзал.
Үзірлі жағдаймен ұйықтап сәресіге тұра алмай өткізіп алса, оразасын ниет етіп жалғастыруына болады. Сәресіге тұрмауды әдет етіп алмау қажет.
Сәресін ішудегі мақсат – күндізгі ұстайтын ораза үшін дайындық. Егер сәресін ішпесе, адам күндізгі оразасын тұтуда қиналады. Сонымен қатар кешке мазасызданып, әлсіреп, ғибадат ету қиындық тудырады. Ислам – жеңілдік діні. Ниет етіп, сәресіге тұрып ас ішу – қайырлы амал.
Пайғамбармыздың (с.а.у.) хадистерінде: «Сәресін ішіңдер. Әрине сәресінде береке бар!», «Сәресі тамағымен күндізгі оразаға күш алыңдар, ал түсте ұйықтап алумен түнгі намазға күш алыңдар», «Сәресіне тұрыңыздар. Себебі, біздің оразамыз бен кітап иелерінің (яһудилер мен христиандар) оразасының айырмашылығы – сәресін ішу» деген.
Сәресін жібермей, оразаны шынайы ықыласпен өткізуімізді Алла нәсіп етсін!
Икрам АЙТАЕВ
