Сұрақ: Қадір түнін қалай өткізген дұрыс?
Жауап: Қадір түні Алла Тағала құдіретімен алғашқы аяттарды түсірген. Ол мың айдан да қайырлы екенін «Қадір» сүресінде толық баяндаған. Қадір түндерін өз деңгейінде қайырлы өткізу үшін нәпіл намаздарын арттыру, Құран аяттарын көбірек оқу, білетін дұғаларын оқу, пенделікпен істеген күнәларына өкінішпен кешірім сұрау, мақтаж адамдарға садақа беру, Пайғамбармызға (с.а.у.) салауаттар айту, мешіттерден немесе телеарналардан уағыз-насихаттарды тыңдау, т.б. жақсы амалдар жасаған абзал.
Қадір түні Рамазан айының соңғы он күндігінің тақ күндері болуы мүмкіндігі жайлы хадистерде келген. Сондықтан осы түндерде құлшылықтарымызды арттырғанымыз дұрыс. Дегенмен Рамазанның 26-сынан 27-сіне қараған түннің Қадір түні болу ықтималдығы жоғары. Бұл түн биыл наурыз айының 26-сынан 27-сіне қараған түнге сәйкес келеді.
Пайғамбармыздың (с.а.у.) хадисінде: «Кімде-кім Қадір түнін иманмен, ықыласпен, ғибадат жасаумен өткізсе, оның өткен күнәлары кешіріледі» деген. Тағы басқа хадистерде: «Қадір түнін Рамазанның соңғы он түнінің тақ кештерінен іздеңіздер», «Қадір түні жиырма жетінші түн»деген. Қасиетті кешті шынайы ықыласпен өткізуімізді Алла нәсіп етсін!
Икрам АЙТАЕВ
