Сұрақ: Интернетте діни пәтуа беріп отыратын адамдар көп. Оларды тыңдауға бола ма?
Жауап: Қазіргі таңда әлеуметтік желілерде діни білімсіз, негізсіз пәтуа беріп жүрген «шейхсымақтар» жиі кездеседі. Діни сұрақтың жауабы шариғатта бола тұра оны ескермей, өз ойымен пәтуа беру – кереғар діни ағымдарға тән қасиет. Шетелде отырып өз мүдделері негізінде дәстүрлі тағылымға жат діни пәтуалармен адамдарды шынайы діннен адастырып жатады. Мұндай пәтуаларға еліктегендер, қоғамда діни алауыздық туғызып, адамдар арасында дау-дамайға себеп болады.
Сондай-ақ, отбасылық қатынастарды бұзып, адамдардың өміріне кері әсер етеді. Заңға қайшы пәтуалары елдің діни тұрақтылығына сызат түсіреді.
Егер қандай да бір діни үкімнің дұрыстығына күмән болса, оны отандық ғалымдардан сұрап, сенімді ақпарат көздерінен тексергеніміз жөн. Діни мәселеде нақты дәлелдерге сүйенген, беделді және білімді ғалымдардың кеңесіне жүгінгеніміз абзал. Діни пәтуа мәселесінде ҚМДБ-ның Ғұламалар кеңесі өз деңгейінде елдің діни тұрақтылығы үшін жұмыстарын жасап жатыр.
«Нахыл» сүресінің 116-аятында: «(Алладан және пайғамбардан келген қандай да бір дәлелге сүйенбестен) тілдеріңнің өтірік сипаттауымен «Мынау адал, мынау арам» деп айтпаңдар!Олай айтатын болсаңдар, (адал немесе арам деп үкім беру бір Аллаға ғана тән болғандықтан) Алланың атынан өтірік айтқан боласыңдар. Аллаға өтірік сөзді теліп, Оның атынан өтірік айтатындар әсте мақсат-мұратына жетпейді» деген.
Икрам АЙТАЕВ
