ҚМДБ «Халал Даму» стандарттау және сертификаттау мекемесінің директоры Айбек Асқарбекұлы мен технолог Мейіржан Бауыржанұлы Өскемен қаласындағы халал стандарты бойынша сертификатталған кәсіпорындарда айлық аудит жұмыстарын жүргізді.
Атап айтқанда, «Өскемен» құс фабрикасы, «Эмиль» балмұздақ және сүт фабрикасы, «Восток Молоко» сүт зауыты, «Айтас МП» шұжық цехы және де өңірдегі қоғамдық тамақтану орындары, ет дүкендері, кондитерлік цехтар тексерілді.
Аудит барысында өндіріс орындарының халал стандарттарына сәйкестігі жан-жақты қарастырылып, шикізаттан бастап дайын өнімге дейінгі барлық технологиялық процестер мұқият зерттелді. Тексеру нәтижесінде кәсіпорындарға бірқатар ұсыныстар беріліп, өндірістің халал талаптарына сәйкестігін сақтау бойынша нұсқаулар айтылды. Кәсіпкерлер халал талаптарын қатаң сақтайтынын және тұтынушыларға сапалы өнім ұсынуға мүдделі екенін атап өтті. Сондай-ақ, сарапшылар кәсіпорын қызметкерлеріне халал талаптары бойынша түсіндіру жұмыстарын жүргізіп, өндірістік құжаттардың сәйкестігін тексерді.
Айбек Асқарбекұлы «Халал Даму» мамандарының осындай бақылау шаралары тұтынушылардың сенімін нығайтып, халал индустриясының сапасын арттыруға ықпал ететінін атап өтті. Алдағы уақытта да аймақтарда тұрақты түрде тексеріс жұмыстары жүргізіліп, халал өндірісінің сапасы мен адалдығын қамтамасыз ету мақсатында кешенді шаралар атқарылатынын жеткізді.
