Қазақстан мұсылмандары діни басқармасының интернет-ресурстарына 2024 жылы 27 084 контент жарияланды. Бұл туралы ҚМДБ Ақпарат бөлімінің меңгерушісі Ағабек Қонарбайұлы хабарлады.
«2024 жылдың 1 қаңтарынан бастап muftyat.kz ресми сайтына 1 646 жаңалық, 128 мақала, 18 пәтуа мен 56 сұрақ-жауап, 60 видео жарияланды. Бүгінгі таңда Қазақстан мұсылмандары діни басқармасының ресми ақпараттарын насихаттайтын және бөлім жұмыстарына арналған 30 сайт жұмыс істейді. Сайттардың 2024 жылғы қаралым саны 42 миллионға жетті. Өкілдіктерге қарасты сайттарда 26 407 материал жарық көрген. Мүфтияттың ресми сайтын 2024 жылдың 1 қаңтары мен 31 желтоқсан аралығында 5 миллион адам қарады. Тәулігіне тұрақты 15-18 мың оқырман, Рамазан мен Мәуліт айлары, Құрбан айт, Ораза айт мерекелерінде тәулігіне 35000, ең көбі 113 827 қолданушы сайтты қараған» деді бөлім меңгерушісі.
Бөлім мамандары Бас мүфти Наурызбай қажы Тағанұлының сұхбаттарын әртүрлі БАҚ алаңында ұйымдастырып, халықаралық және республикалық телеарналарда, газет-журналдар мен порталдарда жарық көруіне атсалысты. Қасиетті Рамазан айы және мұсылманның үмметінің ұлық мерекесі Құрбан айт қарсаңында баспасөз брифингін ұйымдастырды. 1000-нан астам фото-баннер әзірленіп, әлеуметтік желілерге таратылды.
