Сұрақ: Күйеуім мас кезде екі талақ айтты. Бірнеше күннен кейін ұрысып қалғанда тағы екі талақ айтты. Бұның үкімі қалай болмақ?
Жауап: Исламда арақ-шарап ішу – харам. Ішкен адам күнәға батады. Мас адам өзіне де, отбасына да, қоғамға да зиянын тигізеді. Ислам шариғатында талақ беру – жауапкершілікті талап ететін іс. Адам ашу үстінде, мас күйінде т.б. жағдайларда талақ беруі қаншалықты дұрыс немесе бұрыстығы жайлы түрлі пікірлер кездеседі. Егер ер адам талақ сөзін ашумен, мастықпен немесе ойланбай айтса, бұл талақ болып саналмауы мүмкін деген пікірлер де бар.
Талақтың өзіндік шарттары бар:
– ер адамның ақыл-есінің болуы;
– талақ сөздерін саналы түрде және нақты ниетпен айтуы;
– әйелдің идда (етеккір кезеңі т.б.) мерзімі кезінде болмауы.
Ер кісі жұбайымен бірге отырып, мейірімділікпен әңгімелесуді тұрақты ісіне айналдыруы керек. Пайғамбарымыз (с.а.у.) адамзатқа жанұямен қандай қарым-қатынаста болу керектігін хадистерінде баяндаған. Бір хадисінде: «Сендердің жақсыларың жанұяларына жақсы болғаны, мен сендердің ішінде жанұясына ең жақсы қарайтын адаммын», – деген. «Ниса» сүресінің 19-аятында: «Жұбайларыңмен жақсы қарым-қатынаста болыңдар», – деп, отбасыны сақтап қалу қайырлы іс екендігін меңзеген.
Талақ мәселесінде тұрғылықты ҚМДБ-нің қала, аудандардағы пәтуаға жауапты имамдарына қосымша жүгінгеніңіз абзал болады.
Икрам АЙТАЕВ
