Жамбыл облысы Байзақ ауданының тұрғындары ҚМДБ «Зекет және қайырымдылық» қорының «Ел үлесі – пәтерге» жобасы арқылы асарлатып үй салып көпке үлгі көрсетуде. Аудан әкімінің міндетін атқарушы Болат Сағынбеков пен аудан бас имамы Қанат Жұмағұл тағы бір отбасын қуанышқа кенелткен сәтке куә болып, Мәдімар ауылында баспаналы болған көпбалалы отбасыны құттықтады.
Жобаның басты мақсаты – ауыл жұртшылығын жанашырлық пен бірлікке жұмылдырып, сол арқылы жас ұрпаққа өнеге көрсете отырып, әлеуметтік осал топтағы, көп балалы отбасылар мен мұқтаж жандарға үй соғып беру.
– Қазақта «Бірлік болмай тірлік болмас «деген сөзді бекерге айтпаған. Береке қай жерде орнаса, сол жерде құт пен ырыс қонақтайды. Ауыл халқы қай істе де ауызбіршілікті, ынтымақты ту етіп келеді. Шаруасы шираған ауылда береке бар, тындырымды іс бар. Тірліктеріне мығым мәдімарлықтардың өнегелі тірліктерін үлгі етуге тұралықтай, – деді өз сөзінде Болат Мырзаханұлы.
Айтулы шарада Жамбыл облысы мәслихатының депутаты, «Ауыл» партиясы Жамбыл облыстық өңірлік филиалының төрағасы, осы ауылдың тумасы Алтай Райқұлов, аудандық «Байзақ баба» мешітінің бас имамы Қанат Әділханұлы, ауыл тұрғындары атынан ақсақалдар алқасының төрағасы Жамбыл Даулетов жүрекжарды лебіздерін арнады. Алтай Мақсұтұлы жаңа баспанаға кіргелі отырған отбасына тоңазытқыш, шаңсорғыш, қысқа толқынды пешті сыйға тарту етті.
Жаңа баспананың лентасы салтанатты түрде қиылып, ақ жаулықты аналар шашу шашты. Құтты болсын айтып келіп жатқан ауылдастардың көтеріңкі көңіл күйіне сіркірей жауған жаңбыр да бөгет бола алмады. «Ел үлесі – пәтерге» жобасы аясында 798-баспананың кілті Мәдімар ауылында көпбалалы тұрғынына пайдалануға беріліп отыр.
Көптің көмегімен салынған 6 бөлмелі үй жылу жүйесімен, таза ауыз сумен, газбен қамтылған. Қоныс тойын тойлап отырған 7 баланың ата-анасы көпшілікке алғыстарын жеткізді.
